Thursday, June 9, 2011

اعطونا اللى كان عند جمال و عز…بس

مصر وقت مبارك كانت تحكم من مجموعتان. مجموعة مكونة من مبارك و جهاز شرطتة و مجموعة يمثلها كبار جنرلات الجيش. مبارك كان يراس الجيش و لكن كان واضح ان فيه اتفاق خفى بين الاثنين ينص على تقسيم مصر بين المجموعتان. مبارك و ابنه و اصحاب ابنه لهم 70% من البلد و الكام جنرال فى الجيش له 30%.

و علشان الاثنين يسيبوا بعض يلعبوا براحتهم محدش كان بيتدخل فى شئون الثانى و فى اخر اليوم المجموعتان بيناموا و هم مبسوطين. بمعنى ان الجنرلات سايبين جمال و عز يبرطعوا فى البلد و فى المقابل محدش بيقول للجنرلات بتعملوا ايه ولا فين ضرائب شركاتكم ولا ايه نظام عمولات السلاح الخ الخ

حتى موضوع التوريث, اعتقد كان بردو هايتظبط لو وصل الاثنين لاتفاق ما يحفظ مصالح كل طرف. عارف ان ويكيليكس كشفت ان قيادة الجيش بما فيهم عمر سليمان كانوا غير راضيين بالتوريث و لكن الغريب ان محدش اتحرك منهم. ايه سبب عدم التحرك ده؟ مخطط التوريث كان واضح جدا جدا و اول ناس اتحركوا هم شوية نشطاء غلابة و عملوا حركة كفاية سنه 2004.  ليه قيادة الجيش لم تقم بعمل انقلاب لما جمال و اصحابه تفحشوا فى البلد بالشكل ده؟ ده كان الشعب كله التف حوالين قيادة الجيش و كانوا فعلا هم من قام بالثورة.

المهم, ايه بقى اللى بيحصل دلوقت. ادينا قمنا بثورة و اطحنا بنظام مبارك و زى الشطار كده ادينا البلد لجنرلات الجيش. اصحاب ال 30%. واضح قوى من كل اللى المجلس عمله من 11 فبراير الى اليوم ان همه الاول و الوحيد هو الحفاظ على هذه النسبه. و الحفاظ على دولتهم اللى كانت داخل دوله اسمها مصر. و ده كان واضح جدا فى كلام اللواء ممدوح شاهين لما قال ان البرلمان ماينفعش يناقش امور الجيش و الكلام ده (مع ان قادة اقوى جيش فى العالم بيقعدوا زى الفراخ امام اعضاء الكونجرس و اثناء الاستجواب)

علشان قادة الجيش يضمنوا مستقبلهم فى البلد دى لازم يكونوا مسيطرين على كل القرارات و الامور فى مصر بعد مبارك. بالبلدى كده لازم هم اللى يحددوا قوانين اللعبة و بعد كده, بعد ضمان مستقبلهم و مصلحتهم, يقوموا بتسليم البلد لنا و عليها الف مليون بوسة. من اول القرارات الفردية اللى اتخذها المجلس لغاية الاعلان الدستورى ابو 63 مادة برغم ان الاستفتاء كان على 8! كلها قرارات علشان يضمن المجلس مستقبلة فى مصر الجديدة

طيب الجنرالات عايزين ايه؟ عايزين مصر الجديدة تبقى دولتين زى ما كانت. دولة يحكمها مدنيين و دولة يحكمها الجيش. عايزين محدش يقول لهم الموازنة بتاعتكم ايه نظامها ولا فين الضرائب عن الشركات التى تمتلكوها  ولا المليار و 200 مليون اللى بناخدهم من امريكا كل سنه بيروحوا فين ولا ايه نظام العمال اللى بتشغلوهم من المجندين. الخ الخ. من الاخر كده عايزين النموذج التركى, مع انى مش عارف لو الجيش التركى يمتلك محطات بنزين و مصانع ولا لاء.

طيب. انا شخصيا معنديش مانع فى النموذج التركى. يعنى معنديش مانع ان مصر الجديدة تسيب دولة الجنرالات زى ما هى بس عندى مشكلة انهم ينفردوا بقرارات البلد و يغلبوا فصيل سياسى على التانى كله علشان مصلحتهم. يا سيدى خلى ال 30% مش عايزهم. بالهنا و الشفا. بس ادينى ال 70% بتوع عز و جمال و انا اضمن لك النموذج التركى. ماتبوظليش ال 70% باعلان دستورى من 63 مادة و انتخابات ممكن معظمها يكون حسب النظام الفردى تفرز مجلس شعب لا يمثل كل اطياف الشعب.

نفسى حد يكون عنده الجرأة انه يعمل “الدييل” ده مع الجنرالات.

 

  Posted by BP at 1:04 pm Comments (15)